ଲଗାଣ ବର୍ଷାରେ ଆଜି ବମିଖାଲ ଛକରୁ କୋଚିଲେଇ ହାଟ ପର୍ଯ୍ୟନ୍ତ ରାସ୍ତାର ଅବସ୍ଥା ପୂରା ବେହାଲ ହୋଇଯାଇଥିଲା। ରାସ୍ତା ଉପରେ ଆଣ୍ଠୁଏ ଉଚ୍ଚର ବର୍ଷାଜଳ ପ୍ରବାହିତ ହେଉଥିଲା। ବିଶେଷକରି ଏସ୍‌ପ୍ଲା‌ନେଡ୍‌ ଛକ ସାମ୍ନା ରାସ୍ତାର ଅବସ୍ଥା ପୂରା ସାଂଘାତିକ ହୋଇଯାଇଥିଲା। କଳ୍ପନା ଛକରୁ ଆସୁଥିବା ବାଇକ୍‌, କାର୍‌ ଚାଳକମାନେ ଏତକ ରାସ୍ତା ପାର୍‌ ହେବା ପାଇଁ ନାକେଦମ୍‌ ହୋଇଯାଉଥିବା ଦେଖାଯାଇଥିଲା। ସାଇଲେନ୍ସର୍‌ରେ ପାଣି ପଶି କାହା ବାଇକ୍‌, କାର୍‌ ବନ୍ଦ ହୋଇଗଲାଣି ତ କିଏ ଭାରସାମ୍ୟ ହରାଇ ବାଇକ୍‌ରୁ ଖସି ପଡ଼ିଲାଣି। ଆଜି ସଂଧ୍ୟାରେ ଏହି କାରଣରୁ ୩ ଜଣ ଆହତ ହୋଇଥିବା ସୂଚନା ମିଳିଛି।