କଟକ ଗ୍ରାମାଞ୍ଚଳ(ନିପ୍ର)ବଦଳିଛି ଜନ ସେବାର ସଂଜ୍ଞା,ରାଜନୀତି ଓ ସେବାର ରଙ୍ଗ,ତରିକା, ମାନସିକତା।ଦିନ ଥିଲା ଜଣେ ନୀତିଭ୍ରଷ୍ଟ ୯୯ଜଣ ନୀତିବାନ ସୁପୁରୁଷଙ୍କ ଭିତରେ କେଉଁଠି ନିଜର ସତ୍ତା ହରାଇ ବସୁଥିଲା ତାହାର ଟେର ମିଳୁ ନ ଥିଲା।ଏବେ କିନ୍ତୁ ପାଣି ପାଗ ସଂପୂର୍ଣ୍ଣ ଓଲଟା।କୁମ୍ଭୀର କାନ୍ଦଣା କାନ୍ଦୁଥିବା ବ୍ୟକ୍ତି ଯେଉଁଠି ଯେତେ ଖୋଜିଲେ ପ୍ରଚୁର ସଂଖ୍ୟାରେ ମିଳିବେ।ସାରା ଓଡ଼ିଶା ବନ୍ୟାରେ ଉବୁ ଟୁବୁ ଓ ଛାର ଖାର ହେବାକୁ ବସିଲାଣି,ଅଥଚ ଠିକାଦାରି ଲୋଭରେ କଟକ ଜିଲ୍ଲା, କଣ୍ଟାପଡ଼ା ବ୍ଲକ,ବ୍ରାହ୍ମଣସାଇଲୋ ପଞ୍ଚାୟତ କୁଳ ବ୍ରାହ୍ମଣସାଇଲୋ ଠାରେ ଦେବୀ ନଦୀର ଶାଖା କନ୍ଦଳ ନଦୀ ଦକ୍ଷିଣ ପାର୍ଶ୍ଵ ପଠାରେ ଲକ୍ଷ ଲକ୍ଷ ଟଙ୍କା ସରକାରୀ ଅନୁଦାନରେ ନିର୍ମିତ ଘେରି ବନ୍ଧକୁ ଜଣେ ନିର୍ବାଚିତ ଲୋକ ପ୍ରତିନିଧି (ପୂର୍ବରୁ ଠିକାଦାର ଥିଲେ)ରାତିଆ ଜେଶିବି ଲଗାଇ ତାଡି ଦେଇଛନ୍ତି। ଫଳରେ ଘେରି ଭିତରେ ରହୁଥିବା ପରିବାର ଗୁଡ଼ିକ ଘୋର ବିପଦ ଆଶଙ୍କାରେ ରହିଛନ୍ତି।ସ୍ଥାନୀୟ ଲୋକେ ଆପତ୍ତି କରିବାରୁ ତାଙ୍କୁ ବିଡ଼ିଓ ଓ ତହସିଲ ଦାର କହିଥିବାରୁ ସେ ଏପରି କାମ କରୁଛନ୍ତି ବୋଲି କହିଥିବା ଅଭିଯୋଗ ହୋଇଛି।ମାତ୍ର କଥାର ସତ୍ୟ ତା କେତେ ତାହା ଜାଣିବାକୁ କଣ୍ଟାପଡ଼ା ବିଡ଼ିଓ ସନ୍ତୋଷ ପତିଙ୍କୁ ଯେତେ ଯୋଗାଯୋଗ କରାଯାଇ ଥିଲେ ହେଁ,ସେ କିନ୍ତୁ ଫୋନ ଉଠାଇ ନ ଥିଲେ।ତେଣୁ ତାଙ୍କ ମତ ନେବା ସମ୍ଭବ ହୋଇ ନାହିଁ।