ଆନନ୍ଦପୁର,୨୭/୪(ନି.ପ୍ର)ଘର ଛାତରୁ ଲିମ୍ବ ଡାଳ ଭାଙ୍ଗିବା ବେଳେ ଉଚ୍ଚଶକ୍ତି ସମ୍ପନ୍ନ ବିଦ୍ୟୁତ୍ ଲାଇନ୍ ସଂସ୍ପର୍ଶରେ ଆସି ଜଣେ ବ୍ୟକ୍ତି ଗୁରୁତର ହୋଇଛନ୍ତି।ପ୍ରାପ୍ତ ସୂଚନା ଅନୁଯାୟୀ,କେନ୍ଦୁଝର ଜିଲ୍ଲା, ଆନନ୍ଦପୁର ଥାନା ଅନ୍ତର୍ଗତ ମୋଚିନ୍ଦା ଗ୍ରାମର ଦୀନବନ୍ଧୁ ସାହୁ(୫୦)ଆଜି ପୂର୍ବାହ୍ନରେ ନିଜ ଘରର ଛାତ ଉପରକୁ ଯାଇ,ଛାତକୁ ଲାଗିଥିବା ଏକ ଲିମ୍ବ ଡାଳ ଭାଙ୍ଗିବାକୁ ଗଛରେ ଚଢ଼ିଥିଲେ।ମାତ୍ର ଗଛଟି ନିକଟରେ ଯାଇଥିବା ବିଦ୍ୟୁତ୍ ଲାଇନ୍ ସଂସ୍ପର୍ଶରେ ଆସି ଯାଇଥିଲା।ଫଳରେ ଦୀନବନ୍ଧୁ ଛାଟି ହୋଇ ପଡ଼ିଥିଲେ।ସ୍ଥାନୀୟ ଲୋକଙ୍କ ସହଯୋଗ କ୍ରମେ ସଜ୍ଞାହୀନ ଅବସ୍ଥାରେ ୧୦୮ ଆମ୍ବୁଲାନ୍ସ ସେବାରେ ତାଙ୍କୁ ଆନନ୍ଦପୁର ଉପଖଣ୍ଡ ଚିକିତ୍ସାଳୟକୁ ଅଣାଯାଇ ଥିଲା।ପ୍ରାଥମିକ ଚିକିତ୍ସା ପରେ ଅବସ୍ଥା ଗୁରୁତର ଥିବାରୁ ଡାକ୍ତରଙ୍କ ପରାମର୍ଶ କ୍ରମେ କଟକ ବଡ଼ ଡ଼ାକ୍ତଖାନାକୁ ସ୍ଥାନାନ୍ତର କରାଯାଇଛି।ଅଧିକାଂଶ ସ୍ଥଳରେ ଘର ନିକଟ ଦେଇ ଯାଇଥିବା ଉଚ୍ଚଶକ୍ତି ସମ୍ପନ୍ନ ବିଦ୍ୟୁତ୍ ଲାଇନ୍ ଓ ଗଛକୁ ଲାଗିଥିବା ବିଦ୍ୟୁତ୍ ତାରରେ ବିଦ୍ୟୁତ୍ ସରବରାହ ଦୁର୍ଘଟଣା ର କାରଣ ପାଲଟିଥିବା ବେଳେ ବିଭାଗୀୟ ଅଧିକାରୀ ମାନେ ଧାର୍ଯ୍ୟ ରାଇଟ ୱେ ଦୂରତା ପ୍ରତି ନିଜେ ସଚେତନ ହେଉ ନାହାନ୍ତି କିମ୍ବା ଲୋକମାନଙ୍କୁ ମଧ୍ୟ ସଚେତନ କରୁ ନାହାନ୍ତି,ଫଳରେ ବାରମ୍ବାର ବିଦ୍ୟୁତ୍ ଦୁର୍ଘଟଣା ଜନିତ ଧନଜୀବନ କ୍ଷୟ କ୍ଷତି ବଢୁଛି।